ملاحظات سريعة على الأهلي وبرشلونة

Image Hosted by ImageShack.us
الصورة بتعبر عن الأهلي وبرشلونة .. مش كدا
*
*

* الفرقة الموسيقية عزفت النشيد الوطني لمصر ومعبرتش أسبانيا
* مفهمتش أوي تلميح مدحت شلبي لما قال إن الريس دخل الستاد أهو .. وبعدين سكت شوية وضاف .. حاجه جميلة .. ربنا يديله الصحة وطولة العمر
* بمناسبة حضور الريس وكبار رجال الدولة لمباراة ودية في كرة القدم ملهاش أى أهمية سوى الاحتفال بمئوية نادي رياضي .. ومظنش إن الاحتفال بنادي رياضي يستلزم حضور الريس وكبار رجال الدولة إلا لو كانوا جايين يتفرجوا على نجوم برشلونة .. الوضع دا حسسني إننا في كفر مش دولة .. وإن لعيبة برشلونة هما آلهة إغريقية جايين يباركوا الشعب المصري و(يمتعوه) على رأى مدحت شلبي .. بعيدا عن نوعية المتعة بالظبط .. ويمنحوا الشعب بركتهم بالتوقيع المتخلف على الكاميرات
* لما حفيد الريس ظهر وهو ماسك علم مصر تقريبا ولابس أحمر ..أمي اتبسطت قوي وصوتها علي وهي بتتكلم والجو دا .. وقدت تحكيلي – وأنا المفروض صحفي – عن خبر اتنشر في الأخبار بيدور حوالين حفيد الريس وبرشلونة مش فاكره محتواه بالظبط .. المهم .. ماشي اللقطات الإنسانية دي جميلة مقلناش حاجه .. بس يا ترى حفيد الريس بعد ما أتفرج على الماتش وشاف الأهلي بيشيل أربعة .. حيرجع لسه مبسوط بعلم مصر .. ولا حيحلم ببرشلونة
* مدحت شلبي طول المباراة كان مقتنع إن الحكم عصام عبد الفتاح غير اسمه لعصام الحضري .. فكان عصام الحضري هو نجم المباراة الأول .. وكل شوية .. لكن صفارة من عصام الحضري .. وفاول بيحسبه عصام الحضري .. لحد ما كرهت أم الاسم .. بس كويس إن دماغه كانت متوجهة في اتجاه واحد بس .. أحسن ما كان يبقى شوية عصام الحضري وشوية عصام الإبياري وشوية عصام العريان
* الجمهور كان مستواه كويس .. بعيدا عن إن الحضارة دايما بترتبط عند مصوري الماتشات بالمزز .. بس المزز مستواهم مكانش بطال .. وصلنا لدرجة حضارية كويسة في عالم المصورين
* كل المحترفين في الأهلي .. أو هما تلاتة عمى .. كانوا أزبل من الزبالة .. محمد شوقي مسمعتش اسمه تقريبا ولا عماد النحاس ( ممكن الاسم يكون غلط) .. معرفش هو خلى أحمد السيد ليه (ممكن الاسم يكون غلط ) بس يمكن كان محتاجه في الدفاع
* وبس خلاص .. على رأى إبن الجزمة شعبان عبد الرحيم
*
*

تعليقات

‏قال Mai Kamel
اولا الصورة تنم عن العقد في البحث عن المزز وماعلينا

مدت شلبي مش تعليقه بس على الحضري اللى كان ضايع فيه هو كله كان ضايع طول الماتش

4 صفر لبرشلونه يا سلام يا جماعة ده الطبيعي الناس جيه تعلمنا
تحس انه محطوط فى التعليق عشان يحرق دم الجماهير

كله كوم وقعدة الحفيد على حجر الريس.. هو ده المكان اللى محدش هيقعد فيه غير حفيده.. مكنتش فاهماه بصراحة

اخيرا اللعيبة كانو خايفين.. يوصلو لحد الجون ويهنجو .. بنزين خلص ولا متفهمش
بتهيالى معمولهم غسيل مخ انهم في كل الاحوال مش هيجيبو جول

عامة.. مئوية الاهلى وجابو فريق يكسحهم عشان يعلمو الاجيال الجيه ان ما طير طير وارتفع الا ماتاني راح يقع

شفت الحكم المصرية؟!!
‏قال نهى جمال
كنت داخلة أعلق على قصيدة من دون أجنحةٍ أطير بعد ما قرأتها الصبح

لقيتك حطيت موضوع للأهلي ربنا يكرمه ونشوف ماتشات تشرح القلب كده

لست من مشجعين الكرة ولا ليا خلق اقعد اسمع

لكن مجبر أخاك اخواتي بيسمعوا فلازم وحتما اسمع إحباري والزيادة عليه يتحرق دمي اللي لفت نظري موضوع الحضري

وان المعلق كان في اتجاه والماتش في اتجاه

زي ما يكون صورة ومركبين عليها صوت

والأكثر افتخارا الرئيس وحفيده بذات ذات نفسهم شافه الماتش المصون الرافع رأس مصر بالأوي

أنا مش معترضة على الكرة أو رؤيتها لكن أعملها طقوس مبتتعملش في رمضان ولا بنموت نفسنا في حاجة تفيد زي كده يبقى ده التناقض
ووصول مستوى الفكر والنضج لطريق معووج أصلا

ولا التذاكر اللي ادفعت ايه ده هوا احنا شعب مرفه مش ناقصه حاجة ده احنا بنفتري على اللي فوق على كده

يلا ماعلينا يظهر لكيت كتير

معلش يامحمد بس منظر الشوارع وناس ملغبطة وشها وشعرها وناس سابت محاضرتها علشان تروح الاستداد كل ده يثير الاحباط والخجل لو كان ده حالنا

تحياتي ومعلش عملت دوشة هنا
‏قال قلمي الحر
السلام عليكم ..ماتش المبارح كان فريد من نوعه في كل حاجة , من أول اللاعبين لغاية كبار رجال الدولة , اللي نفسي اعرف جه ليه ..تصدق أن حاسة أنهم اللي نحسوا الماتش , يمكن لو من غير كنا عرفناه نجيب حتي 1أو2 في برشلونة , يلا اقول ايه , أنا والله أول ماشفت طلعتهم البيهة قلت بس الاهلي هيشيل النهاردة
أما التعلقي فكان حكاية , أنا حاست أن مدحت شلبي شويه شويه وهيقول قصيدة في الري وحفيده , وكله كوم وربنا يخليك لنا هو ده الاب , جاي يشاركنا فرحتنا , ربنا يخليك لمصر ..وحاجات كده غريبة , حسسستني أننا في دولة مورتنايا وبنحي الرئيس على ابوته بقي وكلام كده..كان نفسي بجد يسكت ويركز في تعليقه على الماتش بدل مايعلق على الرئيس وحفيده
..لفت انتباهي أحد مشجين الاهلي , لما بدأ الماتش كان رافه علمين الاهلي وبرشلونة , وبعدين لما الاهلي شال الاربعة عمل حاجة واحدة , نزل علم الاهلي ورفع علم برشلونة..لاتعليق
‏قال محمد مصطفى
ههههههههه
ايه يا بني ده
انت شكلك مفقوع قوي
على فكرة معاك حق
يا أخي دانا زملكاوي و كنت هاتفرس
‏قال Amr
الريس جه تسويق سياسي امام جماهير الأهلي عشان تحبه

الباقي مسخرة، احمسد السيد لعبه باك لفت حاجة تفرس

هاحكي لك على كوميديا لما نتقابل
‏قال عباس العبد
اولا
حضور الحكومة للماتش طبيعى
لان دى حكومة فاسدة و الاهلى فريق فاسد
فطبيعى يجاملوا بعض
ثانيا
مدحت شلبى
اسطورة التعليق الوطنى
قال ما معناه
انه لو كان مكان الجمهور لقام بتحية النادى الاهلى
و قال برضه ان رونالينهو تمنه بتمن النادى الاهلى كله بكل فروع النشاط الرياضى للأهلى
يعنى فى الضياع
شكرا لبرشلونة
‏قال Cheb Amadou
انا مش غاوى فرجة ع المباريات بس الصدف شاءت أشوف الماتش مع واحد صاحبى على قناة النيل الرياضية، ماعرفش مين اللى كان بيعلق بس هو قال حاجة ماقدرناش نمسك نفسنا من الضحك عليها، قال لما برشلونة نزل لاعب صغير ماعرفش اسمه ايه ان دى فرصة قدام لاعبى برشلونة للظهور أمام نادى كبير زى الأهلى !!!!!!!!!!!!!!
‏قال إبـراهيم ...
لأ ، صحفي يا وااااااااد ... تعرف إني بعد الماتش برضوووو ( ورعم إني مليش ف الكورة أصلاً ) ، ورغم إني ما سمعتوش بتعليق مدحت شلبي أصلاً ........


لكن كنت عاوز أكتب عن منظر الريس وهوا بيجر أزيال الخيبة ، ...


ياللا ف داهية
وكل 100 سنـة وإحنا كده برضووو


تحياتي يا شاعـــر !
‏قال MHMD KORNA
مى

على يدك

مدحت شلبي دا بني آدم بديل


سي يو
‏قال MHMD KORNA
نهى

منورة البلوج

ومش معنى إني نزلت بوست جديد إنك متعلقيش على من دون أجنحةٍ برده

:)

قديما قالوا

الكرة وأم كلثوم هما أفيون الشعب المصري


منورة مرة تانية

سلام
‏قال MHMD KORNA
مادو

ايه دا

هو لسه في زمالكاوية في البلد !!

افتكرتهم انقرضوا خلاص


منور يا ريس
‏قال MHMD KORNA
عمرو

اتقابلنا

ومحكتليش


:(

المشاركات الشائعة