اختيار
لو كنت فاكر خطوتك هي الدليل
تبقى اتهزمت
إوعاك تحس إنك وصلت
لو كل خطوة بألف ميل
كل السكك حواديت بتحكيها البيوت
وبتختلسها الأزمنة
كل الخطاوي حنينة
لو واخدة وعد إنك تفوت
وأنا كل ما أمسك خيط بتنسجني الخيوط
وبتغزل السكك للي كنت خلاص نويت
وبتحترفني العكننة
درويش وجاهل مين أنا
داير على كعوب الخيال بأكتب وبأنشر بالعبيط
بأسمح لنفسي تدوب أوي جوا العيون
وأسمح لي ألون فكرتي 100 صوت ولون
وأشربلي شاي مع أسبرين
وأسرح في حلمين من غنا
درويش وأحلامي الجميلة الممكنة
أقرب كتير من أي عين
بس المهم أكون أمين
مسألش مين مختارش مين
ولا مين سبق بالدندنة
وأكمّل للي إخترت إنه يكون هنا
لو كل خطوة إليه كمين
تعليقات