خد خطوتين

مِتْضَفَّرَة خطاوينا بالفُرقة

وعينينا بالحكايات 

متشبّكين بخيوط ميمسكهاش بشر

متشفَّرة حكاوينا بالحُرقة

وماضينا باللعنات

متسلّطين على بعض في نفس الحفر

كل للي جاهد وانتصر

كان ناقصه بس يحس إن النصر وهم

إن الهزيمة هي الأهم 

وإن الحياة مش ماتش محسوب بالكور

وللي انهزم 

كان ناقصه يفرح إنه عدى المرحلة 

إنه حيتعذب شوية وبعدها 

حيغيب جنان الأسئلة 

كان ناقصه يقفل ألف دايرة

يقيس زواياها الكتيرة بمنقلة 

كان ناقصه إنه يكون دكر

بس الكلام المبتكر

لما انشطر بإيدين مسيح أصبح مطر

وانهال على دماغ الجميع 

زي الربيع أوقات يكون

وساعات يكون زي الحجر

والكلمة سر

والخطوة سر

والمعنى حتى بقاله سر

خد خطوتين 

أو هات تلاتة 

متنتظرش ولا أنتظر

ده الوقت مر