العساكر

Image Hosted by ImageShack.us
.. يجري منها
يجري من ظلم في بدنها
نار تشعلل رغبة دايمة في امتلاكه
و أمّا ساب رجليه لعنانها
كنش عارف
يجري من .. و لّا لـ هلاكه
يومها يوسف داق في سجنه ظلم فرعون و العساكر
Image Hosted by ImageShack.us
العساكر و الفنادق متقاسين سوا بالنجوم
و النسور اللي في كتافهم متدارين وسط الغيوم
و الشرار اللي في عيونهم
و المرار اللي في عينينا
و الحديد اللي في ايدينا
مصر صارت خايفه تداس بالسوارس
زي ما اتداست أمينه
العساكر ..
اللي قرفونا بجملة "مصر آمنه !!"
نسيوا كلمة " مستكينه "
Image Hosted by ImageShack.us
عينها مكسورة و حزينة
زي ما تكون عامله عمله
أو كمين آداب ظبطها
قاعدة تنتف شعر باطها
أما ايه هيكون غلطها
فالغلط مطوي في دفاتر
ساكنة في ايدين العساكر
عششوا جوه المكاتب
اللي واكل و اللي شارب
و اللي همّه ع الرواتب
و اللي طق في عقله ثورة تزيح ملكنا
تبني كون بنظام يساعنا
و النظام .. اسمه الفراعنة
Image Hosted by ImageShack.us
أي باشا فيه فوقينا
و إن لابد تعيش بشرفك
يبقى ترحل – زي موسى – م المدينة
أو تخاف دهس السوارس .. كيف أمينه
توب علينا
دا العويل مالي الحناجر
م العساكر ..
اللي أمروا الشمس تطلع .. من هدومها
حتى روحي لما ماتت قلقوا نومها
و الفصول مبقوش تمانية
هم أصلا كام عددهم ؟!
كل يوم و التاني عيدهم ..
عيد جنابه .. عيد ميلاده
عيد بلوغ ابنه الصغير
Image Hosted by ImageShack.us
و أما يجي شهر نيسان المعظم
العساكر لبسوا أبيض .. بس برضك مش ملايكه
العساكر سوط بيدوي
ألف آهه في جته قايده
Image Hosted by ImageShack.us
العساكر بهدلونا
مرمطونا
طلعوا ميتين أبونا
و احنا احنا ..
في أي محنة
نضرب التعظيم و نسأل : أي خدمة ؟
نعشق الميري و نعبد أي هدمة ..
شامه ريحته
البسوا الأسود علينا
مصر ماتت يوم ما يوسف داق في سجنه ظلم فرعون و العساكر
Image Hosted by ImageShack.us
العساكر اللي ساجنين سيدنا يوسف كانوا ايه ؟!
أمن دوله .. أو مباحث .. أو ضرايب
أو عساكر لابسه ملكي
وقفوا خانقين الشوارع ..
"الشهيد" .. "طلعت" .. و" فلكي"
مرصوصين خوذه في خوذه
و العصاية جاهزة جدا
تقلب الثورة لفوضى
و الميدان أرض المطاردة
يوأدوا الشاب اللي ثاير
يضربوا المارش الإلاهي
تنطلق فِرَق العساكر
Image Hosted by ImageShack.us
. يجري منها
يجري من ظلم في بدنها
نار تشعلل رغبة دايمة في امتلاكه
و أمّا ساب رجليه لعنانها ..
كنش عارف
يجري من و لّا لـ هلاكه
ألف يوسف داق في سجنه ظلم فرعون و العساكر..
**
هيثم دبور
صيف 2006

تعليقات

‏قال غير معرف…
يخرب عقلك!!

هاجي تاني يا محمد
قديم ده؟

مودة
‏قال MHMD KORNA
يا عزيزتي هو مخروب خلقة
مش ناقص دعا

:)

القصيدة زى ما مكتوب في الآخر هي للصديق وزميل الدراسة هيثم دبور

أنا بس قطعتها بالصور

مستنيكي


مودة
‏قال Radwa
انت فنان او اكثر انت عبقرى فعلا

جميله اوى اوى اوى كل كلمه فيها ليها معنى جميل وعظيم بس جبت الكلام الجميل دا كله منين
‏قال غير معرف…
! ربنا يعينك يامحمد

هههههههههههههههههههههههههههههه




محمد

مش ناوي ترجع التشات بوكس ؟
‏قال الدبور
خلاص مش بقت تهز الواحد الصور دي من كتر مابقي بيشوفها واقعا يوميا
‏قال الدبور
أزال المؤلف هذا التعليق.
‏قال MHMD KORNA
سندريلا

هيثم حيفرح أوى

:)

شكرا لمرورك
‏قال MHMD KORNA
:):)


حيرجع بإذن الله يا رملة


بس أفضى

كله بميعاده
‏قال MHMD KORNA
الدبور

ملاحظة هامة

مش هو اللي كاتب القصيدة، مجرد تشابه أسماء

:)


منور

المشاركات الشائعة