سخافة .. المتظاهرين

مش ممكن يكونوا دول هما الناس اللي عندهم قدرة على التحرك الشعبي في البلد ! مجموعة من الحنجوريين لا تزيد أعدادهم عن ال25-30 وجه وصوت مألوفين ومعتادين في كل المظاهرات اللي في مصر ، بيخرجوا يهللوا ويهتفوا من غير خطط واضحة وخطوات تنفيذ عملية ، من غير سياسة عليا وخطوات محددة للتأثير في الشارع المصري ودفعه للتعاطف معاهم ! يمكن أكبر دليل على دا مظاهرة إمبارح ..
مظاهرة إمبارح اللي دعت إليها الحركة المصرية من أجل التغيير كانت مهزلة بكل المقاييس .. أول حاجه كانت تقرف فيها عدد المتظاهرين .. فعلى الرغم من إن الشعب المصري كله قرفان وغاضب مما يحدث في لبنان من مجازر وانتهاكات دولية ، خرج إمبارح حوالي 350 واحد فقط من الشعب دا عشان يعلن تضامنه ومساندته لللبنانيين ! وأغلبهم وشوش محفوظة في كل المظاهرات ! .. الحاجه التانية اللي تقرف برده تعمد احتكاك بعض المتظاهرين بالأمن أثناء محاولتهم الخروج من الكردون الأمني المفروض حواليهم في مسيرة في الشوارع !! وأى بنى آدم بيفهم شاف منظر التحرير إمبارح طبيعي جدا إنه كان يلاحظ استحالة خروج مسيرة في ظل زحمة العربيات والاختناق المروري الذي حدث من مجرد وقوف المظاهرة في الميدان محاطة بالأمن المركزي !! لكن برده رغم دا الأشاوس المتظاهرين راحوا يزقوا في الأمن عشان يخرجوا وابتدى الأمن يضيق عليهم المظاهرة وكادت أن تحدث مصادمات كثيرة لولا تدخل الظباط لتهدئة الأمن المركزي !
تالت حاجه تقرف إن المتظاهرين - اللي هما عبارة عن وشوش محفوظة في كل المظاهرات - نسيوا أو تجاهلوا عامدين الغرض من المظاهرة أو الوقفة الاحتجاجية وابتدوا يشتموا حسنى مبارك ويهتفوا ضده زى ماهما متعودين في أغلب مظاهراتهم !! نوع من تكرار نفس الشعارات ونفس الهتافات المحفوظة مع اختلاف الأماكن .. باختصار مقاومة معلبة !! أو مقاومة حافظة مش فاهمه !! ومأظنش أبدا إن من اللائق إن يكون الشعب اللبناني بيتقتل بالشكل دا في حين اللي واقفين للتضامن معه قاعدين بيغنوا (ظاظا) مع على الفيل ويسبوا ويلعنوا في ظاظا حتى لو دا كان نوع من التعبير عن الغضب من الموقف الرسمي المصري .. ولكن غضب - لامؤاخذة - أهبل !
للأسف .. إمبارح كنت حاسس إن أنا في سيرك .. ناس رافعة مجسمات لأطفال لبنان الشهداء وبيلفوا بيهم ، وكل واحد ماسك مايك ولامم حواليه 15-20 واحد وقاعدين يهتفوا ! مجموعة دواير ومجسمات الشهداء بتلف ما بينهم .. أما على الجنينة فكان قاعد شباب حزب الغد وحزب العمل وقاعدين يغنوا وعايشين حياتهم تماما ولا أكنهم في رحلة ! واتنين من المتظاهرين بيوشوا بعض ( أنا حأروح أحتك بالأمن وتعالى حصلني !! ) وكأن غرض المظاهرة هو الاحتكاك بالأمن عشان الوشوش المحفوظة دي تظهر في صورة الأبطال والمقاومين
باختصار كانت مظاهرة مقرفة
فلتسقط المظاهرات
Image Hosted by ImageShack.us
هى دي بقى كل المظاهرة .. يا فرحتي !!
Image Hosted by ImageShack.us

Image Hosted by ImageShack.us

Image Hosted by ImageShack.us
ودي صورة على الفيل وهو بيغني ظاظا !!
شاهد الكليب

Image Hosted by ImageShack.us

ودول شباب سهرانين بيغنوا بعد صلاة المغرب !!

شاهد الكليب

http://www.zippyvideos.com/5520729385721276/imgp0336/

Image Hosted by ImageShack.us

دي الناس اللي بتصلي في المظاهرة .. شفتوا العدد غفير إزاى !

Image Hosted by ImageShack.us

الظابط الوحيد اللي جه صلى مع المتظاهرين ! واحد كان واقف جنبي بيصوره قاللي أراهنك إنه حيترفد بكرة

Image Hosted by ImageShack.us

Image Hosted by ImageShack.us

Image Hosted by ImageShack.us

Image Hosted by ImageShack.us

Image Hosted by ImageShack.us

لا مزيد

كفاية عليكوا كده

الباقي كليبات تقيله ومش حتضيف حاجه

شطبنا

تعليقات

‏قال Whynotwhywhynot
Ya Salaaaaam! wy syadetek shayef el7al eih ba2a?
‏قال mai
الظاهر المتظاهرين دول حافظين مش فاهمين يا قرنة..
الاخ اللى معلق فوق او الاخت حل لإيه؟؟ الولد مطرحش مشكلة عشان نحتاج فيها لحل..
مظاهرة وكانت زبالة
so what????
‏قال Mr.GEMYHOoOD
أزال أحد مشرفي المدونة هذا التعليق.
‏قال محمد سيد حسن
أزال أحد مشرفي المدونة هذا التعليق.
‏قال محمود عزت
بص يا محمد , هو السؤال الحقيقي هل المظاهرات نفسها ضرورية ؟
لو كنت بتقول لأ , متقراش بقية الرد ,
ولكن لو قلت أيوه


قللي , الناس الكتير اللي يعملوا مظاهرة مرضية و غير هزيلة و زبالة !! دول حييجوا المظاهرات او حيتشجعوا إزاي؟
إديك إنت قلت , الدنيا مولعة و محدش جه ! , مش لازم برضه الوجوه المحفوظة اللي بتتكلم عنها دي تنزل مرة و إتنين و تلاتة و عشرة عشان الناس بعد كده تعرف و تفهم و تشوف و تنزل معاهم !!


لو قلتلي إن السبب في عدم نزول الناس للمظاهرة هو إنها غير منظمة و إن بيحصل فيها تجاوزات يبقى ده رأيك و رأيي إني أعرف ناس بتييجي لو أول مرة المظاهرة و عددهم بيزيد في كل مرة و بيبقوا فاهمين إن تنظيم مظاهرة في مصر شئ صعب عشان حاجات كتير حيبقى ليها نقاشها لوحدها بس دورهم إنهم ييجوا و يشاركوا



و دي النقطة التانية , إنك لو فعلا عرفت الوجوه المحفوظة دي _و مش مشكلتهم إنهم بقوا محفوظين , بيقوموا بدورهم في مجتمع سلبي للأسف حتى مش عاجبه إن حد يقوم بدوره بإنتظام _ و ميزت منها اللي بيتعمد يعمل التجاوزات أكيد مكنتش كتبت الكلام ده , لأن الهتيفة و ثورجية الخناقات معروفين حتى جوه كفاية لكن إننا نجمع و نقول وجوه محفوظة و ناس عايزة تتلمع كده يبقى ده إسمه كلام مرسل يا محمد و كلام عام عن الناس اللي في المظاهرة و عن المظاهرات ككل



بالنسبة للهتاف عن حسني مبارك و غيره , ليهم رأي برضه عرفته من منسقي المظاهرات إن الهدف منها إننا نربط الناس بمشكلته الرئيسية , الباك جراوند الأصلي للي إحنا فيه
عشان الناس متبقاش عمالة تسخن بس كل ما حدث يحصل , لكن لو مفيش حاجة تفضل الناس نايمة و متتحركش لقضيتها
مزج الخاص بالعام يعني عشان الموضوع يبقى أوضح في أذهان الناس و سواء كنت بختلف معاهم او لأ , انا حفضل أنزل المظاهرات "الزبالة! " دي مع الناس " المحفوظين " دول عشان ده دوري و لإن بعتقد إن لو كل واحد عمل زيي فده بيخلي المظاهرة اكبر و انجح و لإني بحاول أوصل رأيي للناس دول كل ما فرصة تسمح عن طريق ندواتهم و إجتماعاتهم
لكن تسقط المظاهرات و مظاهرة زبالة و مقززة و ناس كدابين زفة , فده كلام أشبه ما يكون بكلام نبيل لوقا بباوي و جابر بن حيان , معتقدش إنه بينتقد بشكل إيجابي أو حيكون ليه أثر إيجابي على الموضوع
‏قال محمد قرنه
ماشي ياعم محمود

نمشيها واحدة واحدة


طبعا المظاهرات ضرورية ودا شئ مش إحنا اللي بنفرضه لكن بيتفرض علينا من الظروف المحيطة

تاني نقطة

ماشي
وبالفعل نزلوا مرة واتنين وألف واتقبض على بعضهم واتعملوا أبطال في بعض وجهات النظر أو اتعملت لهم ملفات في أمن الدولة في وجهة نظر التانية
المهم من كل دا
لما نلاقيهم بينزلوا مرة واتنين و10 والناس مبتستجيبش ليهم بالقدر المطلوب يبقى بديهي جدا فيه حاجه غلط في أسلوب تفاعلهم أو في قدرتهم على التأثير على الناس

مظنش السبب في امتناع الناس عن المشاركة الي قلته ، وأنا يا محمود معرضتش أسباب لامتناع الناس عن الظاهرة ولا رجعت دا للاحتكاكات المتعمدة أحيانا والتي تكون دفاعا عن النفس في كثير من الأحيان ، أنا ببساطة معرفش السبب !! لكن أيا كان السبب فدا يدل على إن أسلوب الناس المحفوطة دا غلط
أو محتاج يتعدل ويتفعل بشكل أكبر بكتير من كدا ، الإعلام بموعد ومكان وهدف المظاهرة نفسه مينفعش يكون عن طريق شوية مواقع وحاجات شفهية !! صدقني في حاجات كتير غلط ، ولازم أقول إن فيه حاجه غلط ألف مرة لما يبقى بعد كل اللي بيحصل في لبنان دا وألاقي المظاهرة في التحرير لو حلفولي على المية تجمد ميزيدش عن 500 !!

مادام الهتيفة والثورجية واللي بيحتكوا بالأمن معروفين حتى جوا كفاية يبقى مختلفناش ، أنا مأدنتش الكل ، أنا أدنت تصرفات أنا شفتها بأم عيني ، وتكراري كلمة الوجوه المحفوظة مش سخط عليهم أد ماهو سخط على وسائل التنظيم الجيد والإعلام الجيد اللي يخلي مظاهرة للبنان في عز ما بتتحرق وفي قلب القاهرة تطلع بالشكل الهزلي اللي طلعت بيه دا !!

بالنسبة للهتاف ضد حسني ممكن ! بس .............
أولا :
يبقى بشكل متحضر وبارتباط وثيق مع موقفه الأول من العدوان وإدانة حزب الله ، مش يبقى ترديد ظاظا مع على الفيل في ظل مظاهرة للبنان !!
ثانيا :
لما الهتاف لعم حسني بيه يخرج المظاهرة من إطارها العام اللي المفروض الناس مدعوه للخروج للتظاهر من أجله يبقى أقول ألف لأ

على فكرة أنا كل دا مش عارف إنت بتكلمني ولا بتكلم سيد .. يا جماعة والنبي إعملوا أجانب معلش واتكلموا باسم العيلة ، بس عامة أنا لا استخدمت لفظ زبالة ولا مقززة ولا كدابين زفة ولا أعتقد أن محفوظين شتيمة !! أنا قلت المظاهرة مقرفة ،، والقرف في الأول وفي الآخر شعور داخلي !!



هههههههههههههههههههههههههههههههه
هههههههههههههههههههههههههههههههه
هههههههههههههههههههههههههههههههه

بمناسبة الشعور الداخلي بقى
جتكم القرف جميعا

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه


اكتبوا اسم العيلة يا خلايق ،، برده محجوب دخل في الشات وراح قايل يا محمد وقعد يدش ،، رحت قعدت أدش وراه وهو في الآخر بيكلم سيد مش بيكلمني أنا !! حددوا يا بشر :mad
‏قال محمود عزت
هههههههههههههههههههههههههههههههههههههههههههههههههههههههههههههههههه

الله يحرب عقلك يا قرنة!

يابني انا بناقش مقالك
على كل حال !

نمشي واحدة واحدة برضه
إنت شايف إن عدد المظاهرات حيزيد بعد كام مظاهرة
انا شايف إنه عدد ضعف اللي حصل , إحنا بنتكلم في ناس أصلا بتخاف تتكلم جوا بيوتها أو في الشغل مع بعض بصوت عالي

بس برضه عندك حق في النقطة اللي بعديها
أكيد الموضوع محتاج لتنظيم و ترتيب أعلى و أكتر ذكاء
وأنا مرضتش أفتح الموضوع ده لكن فعلا فيه سلبيات كتير موجود في المظاهرات نتيجة إن ثقافة التظاهر و الإعتراض غير ناضجة في بلد زي مصر
السلبيات دي بيتم الإعتراف بيها دوريا و اخر مرة سمعت من كمال خليل نفسه إننا محتاجين كتير من التعلم و التجريب لحد ما نوصل لمستوى المظاهرة الفعالة
ده حيحصل بكتير من الجهد و التفعيل و النزول

أما الهتاف ضد حسني أنا أحيانا بتضايق من الهتافات السوقية ضد أي حد
لكن أنا قلت لك رأيهم و هما كحركة بتقود المظاهرة ليهم فكرهم الخاص نتفق معاه أو نختلف

في الأخر يا قرنة كل اللي طالبه منك تراجع عنوان مقالك
اللي مهما كان أدبي الأسلوب و مطلق فبرضه أنا شايف إنه غير مناسب و كذلك نهاية المقال
تعميمك مكنش بيوضح وجهة نظرك الخاصة لكن بيخلي الناس تتقسم نصين
مظاهرات آه
مظاهرات لأ

و أنا بكلمك إنت يا قرنة
أيوه أنت يا أبو تي شرت أبيض مقلم
‏قال غير معرف…
انا عمرى ما شاركت في مظاهرة ولكن ذهبت اليوم ده علشان مساندة لبنان وفلسطين ووصلت الي الرصيف المقابل للميدان ولسه بحاول اعدي علشان اوصل للميدان لقيت اثين جانبي وبيسالونى ارجعي كده ممنوع سالتهم ليه قال واحد امشي علي الرصيف وروحي لحالك دخلت معه في نقاش لغاية ما بقي حواليه اربعه بملابس مدنية عايزة اسالك ليه الامن يعمل كوردون علي المظاهرة من اساسه مش بيشوفوا الناس في الغرب بتعمل ايه طبعا نسيت اقولك ان القوات غير عادي وكتير جدا بملابس مدنيه كل اللي كان بيقف حتيي لمجرد المشاهدة كان بيجبروه علي عدم الوقوف علشان كده الناس مش بتشارك كمان اختيار هذا المكان خطا كبير لان اكيد الوصول صعب في ظل الامن الكتير لازم الناس تتحرك لان حقها في التعبير

المشاركات الشائعة