حصاد الإسبوع

شعور غريب أوى كان إمبارح بالليل ، مع إني مقربتش ناحية موكب تمثال رمسيس واكتفيت بالفرجة عليه من الهوم سويت هوم ، بس بجد كان شعور غريب ، بعيدا طبعا عن علثمة وارتباك اللي كانوا المفروض بيذيعوا الحدث العالمي دا على القناة الأولى والفضائية المصرية حصريا .. واللي فجأة لقوا نفسهم قدام 10 ساعات من البث الحى المتواصل فمعرفوش يعملوا إيه غير إنهم يذكروا كل معلومة حوالي 365 ألف مرة تقريبا ! بس الموسيقى التصويرية كانت معقولة بس كانت محتاجة تتجدد مكانش ينفع تفضل طول الوقت هى هى خصوصا وهى متاخدة من فيلم عودي يا هاميس !!
بس بعيدا عن دا كله منظر التمثال بضخامته وهو بيعبر بين العمارات اللي الناس فيها طالعين يتفرجوا عليه كان بجد منظر رهيب ! الكاميرا لما كانت بتقرب من وش التمثال - اللي عمري في حياتي ما فكرت أبصله لما كان في ميدانه !- كنت بألاقيه مبتسم ! ابتسامة خفية مخنوقة تحت صخر الجرانيت اللي هو منحوت منه ، بس في النهاية ابتسامة ! أمناء الشرطة اللي كانوا محوطين التمثال من الجانبين وكانوا بيجروا حواليه لما بتسرع العربية من سرعتها - ودا نادر اما حصل - برده كان شكلهم أكنهم استقبال ملكي وحراسة لتأمين طريقه !!
التمثال طلع كوبري المنيب مع بداية سطوع الشمس ، وقت الفجر .. وهو وقت مقدس عند الفراعنة زيه زى الغروب ، وفي الفجر كان التمثال بيعبر من فوق نهر النيل - اللي كان ومازال من أعمدة الحياة أو العماد الأهم للحياة في مصر - ، كان راجع للجيزة مقر حضارتهم القديمة ، من فوق النيل !!
الجميل بجد ، لما اقترب التمثال من الأهرامات وأصبح ممكن رؤيتها في الكادر بجانبه ، مش عارف ليه حسيت إنه كان بيتفرج علينا إمبارح !! كان بييحي شعبه وبيطمن على اللي حضارته أنجزته وإن لسه موجود لحد اللحظة ، مش عارف ليه كل ما الكادر كان بييجي على وش التمثال كنت بأحس إن الرحلة دي متخططلها من زمااااااااااااااااااااان
من 3200 سنة !!
================================
بقلم .. عبد الرحمن الأبنودي

تعليقات

‏قال Ahmoss
طب ما حسيتش أنه كان زعلان على النيل لحظة عبوره كما لو كان أحفاده أجروه للهكسوس أو الحيثين
‏قال محمد قرنه
لأ للأسف ، بأقولك كنت شايفه بيبتسم ، عامة أنا مش عارف إنت تقصد إيه بالحيثيين والهكسوس بالظبط ، بس متنساش إن رمسيس كان فرعون برده عمره ما اهتم بالشعب ! الرحلة كان هدفها إن يتفرج على رعاياه واللي إنجزوه ويطمن على إنجازات حضارته هو


هذا والله أعلم


لذيذة مدونتك بالمناسبة

المشاركات الشائعة