ثم لسه




"‎
ثم لسه الدفة بتقاوح
رغم إن الموج 8 أمتار
لسه جواها المراكبي حمار
فاكر إن البحر مش مالح

ثم لسه حبيبتي بتجيلي
في المنام وبتعدل المايل
في الصباح أصحى تغنيلي
في المسا بتشيل مأنا شايل

ثم لسه الحلم متوضي
رغم كل العهر في الموضوع
ثم إن الأرض دي أرضي
ثم كس أم العطش والجوع

ثم لسه ولادنا متعودين
إنهم يرموا القلوب سلامات
أي حلم بننتبه له ساعات
بس لو عشناه بيصبح يقين

ثم إنك في اليمين مش يمين
زي قلبك في الشمال مش شمال
كل حلم بينكتب له سؤال
لو تجاوب فزت في الدنيتين
لو تخاف حتعيش ورا الأغلال

ثم أصلا ده الحلال مش حلال
والحرام صابح هو المبدأ
ثم إن الماضي متفتأ
زي شيخ عريان ولابس عقال

ثم إن كلامنا مش منظرة
أو خيال طافح بنور الجنون
ثم إن الناس بتفهم خرا
والغباء في الدنيا على كل لون

ثم لما حنفتكر ما جرى
تحت ضي الشمس تحت الشجر
نلقى كل الكون ده كله انحصر
والسحاب بيقيسنا بالمسطرة

ثم لسه الأرض مليانة نور
ليه نعيش باختيارنا جوا القبور
لما يبقى النسيم وتبقى الزهور
أحلى شيء لو ينكتب ينقرا
‎"

تعليقات

المشاركات الشائعة